Tuesday, 2 November 2010

ليش يعني؟ سيارة واقفة بموقف معاقين بالمطار سنة ما تنشال؟

زميلنا فريج سعود حفظه الله و رعاه كان قد وعدنا منذ فترة بتحليل قيمه جهازه الموبايل عبر سلسلة بوستات "ليش يعني" تقوم بتصوير كل ما هو سلبي ، لكن منذ بوست "بو نجمة اللي معلق نجماته عالمنظرة" ما شفنا من سلسلته شي حالها حال انجازات أحمد الفهد بخطة التنمية. 0
و بغض النظر عن الظروف المواتية التي حرمتنا من البوستات الموعودة ، لكن نبقى و فريج سعود حكومة تدوينية متضامنة "و موتوا قهر" ، و اليوم نعود لكم من خلال هذه الإطلالة على مطار الكويت الدولي. 0
الصورتان التاليتان تم التقاطهما بالمطار بتاريخ 28 فبراير 2010 في مواقف المغادرين بالطابق العلوي.0
السيارة متشرقدة في موقف المعاقين ، و شرطة وزارة الداخلية صكوها مخالفات لما خاب ثناها . بس اللي ما كنت فاهمة ليش ماكو ونش يه و شالها !! يعني هم واجهة بلد و وهم موقف معاقين و فوقها مرفق حيوي ممكن يتم إلحاق الضرر به من خلال هالمهملات بطرق عدة!! 0

طبعاً اتعب على اللي كتب الجازي ، و صدق من قال الحب عذاب الشباب!! 0

المهم ، رجعت أمس من ليفربول العظيمة الأبية أدام الله ظلها الوارف ، و دفعني الشوق آخذ لي طلة بالمواقف العلوية ، و طبعاً صدق ظني و رأيت كاديلاك فؤادي المغبرة لا زالت منسدحة بشموخ في موقف المعاقين ، إلا إن العوامل الجوية قد استبدلت الجازي بعبارات الاستغاثة و الاسترحام لغسل السنكوحة ، و ما زلت مو فاهم ليش ماكو ونش إيي و يشيلها !! 0

سؤال فني بريء : شـ فايدة الحاجز البلاستيكي الأبيض عشان يتركونه ورا السيارة؟

تعددت التواريخ ُ و الغبار ُ واحد ُ 0

للعلم ، المسؤولية عن مواقف المطار هي في عاتق الشركة الكويتية المتحدة لإدارة المشاريع التابعة لشركة مشاريع الكويت القابضة ؛ بالتعاون مع وزارة الداخلية اللي تعرف تخالف من يتبـطـّح بموقف المعاق لكنها ما تعرف تشيل المصيبة اللي حرمت فرد من ذوي الاحتياجات من حقوقه ! 0

24 comments:

خااالف تعرف said...

للاسف

وجود هالسيارة والمخالفات عليها وبهالمكان

استهتار بالنظام
وتقليل من شأنه...

يكون قبل شأنه مو ممسوح بالارض !!

why me said...

wb



تو ما نورت الديره

Um il sa3af wil leef said...

حمدلله على السلامه

:)
أنا سمعت انهم بقصون السياره من فوق ، وبيترسونها ماي ، علشان يسوونها سيارة الأمنيات ، وتقط فيها خردتك وانت رايح وانت ياي من المطار ،بس وين بتروح هالفلوس ماأدري !!ما أقول الا
الله يعين ذوي الاحتياجات الخاصه
:(
شكرا لهذا الموضوع

Anonymous said...

خبري بمواقف المعاقين تكون بالادوار الارضية وقريبة من البوابات

المهم يمكن يكون راعي الكاديلاك هذا معاق

ويمكن يكون متوفي ومحّد يدري عنه

أو يمكن مشترك بهالموقف ودافع إشتراك سنة جدام

في اسباب كثيرة

Anonymous said...

ماكو شيله للسيارة الا و شيلة روي معاها اب يوم واحد ذبحنا هل شايب

panadool said...

مدير الشركة اللى تدير مواقف المطار هو خالد الصايغ
نفس صاحب معاهد فلكس حسين وخالد الصايغ

وهذوله حدهم لاهين بمشاريعهم وفلوسهم
المهم الإيراد ما يووقف

ومجابلين الخصوم بقضايا المحاكم

عثماني said...

اول شي الحمدلله على السلامة

ثانيا عادي ترى

بالديرة اي واحد يبي يسوي شي يسويه ... ماكو احترام لا لقانون ولا اخلاق

:(

Anonymous said...

ياجماعه يعني المعاقين وين يروحون 000< يموتون قهر >

بروفسور حمادو said...

خااالف تعرف

النظام؟ هي فيه حاجة علينا في المقرر اسمها النظام؟

بروفسور حمادو said...

why me

ميرسي أوي أوي

منور بالليتات يا أم وائل

بروفسور حمادو said...

Um il sa3af wil leef

الله يسلمج

بعد ما يبيله ، مشروع الـ
wishing well
بيروح ريعه لدعم المشاريع الخيرية في المارينا كرسنت
:)

الله يعين كل صاحب حق بالهالبلد اللي ناخر فيه سوس الاستهتار لا النخاع

تحياتي

بروفسور حمادو said...

Anonymous

الموقف هذا بالفعل قريب من البوابات ، تلقاه بمواقف المغادرين أمام بوابات الدخول و السيارة تحديدا أمام مدخل رحلات الكويتية رقم واحد

و عشان الاسباب اللي حطيتها رح نحاول نلتمس له العذر ، بس توافق ام السعف و الليف بالاول

بروفسور حمادو said...

Anonymous

لا يبا أرجوك ، لا تربط شيلة السيارة بشيلة روي هودجسون ، ترى تضيع حقوق المعاقين

بروفسور حمادو said...

panadool

الايراد ما رح يوقف لا انشالت السيارة و وقفوا غيرها بمكانها ، بالعكس رح يزيد

اذا تعرفهم و تمون عليهم اللي قلت عنهم تكفة اشرح له حالة السيارة المأساة و لا تييب سيرة المعاقين يمكن ينكسر خاطرهم

بروفسور حمادو said...

عثماني

الله يسلمك من الشر

و مصيبة إذا بيستمر الشعب قوم ما كاري ، و كل شي عنده عادي

بروفسور حمادو said...

Anonymous 3

أتصور عند المجموعة المتخلفة اللي تتسبـّـب و تساهم في هالأعمال المتخلفة ، المعاق حتى غير مسموح له يموت من القهر

why me said...

منو وائل



لا لا لا لا

مابي وائل شوف لك اسم ثاني
;p

Anonymous said...

لازم يكون فيه تشريع يمنح الشرطه صلاحية قطر اي سياره تقف في موقف معاقين و اخذها لكراج الداخليه في حال عدم وجود ملصق خاص بالمعاقين عليها

Um il sa3af wil leef said...

الأسباب والأعذار ممكن تكون كثيره وهذا مو موضوعنا ، الموضوع وين الاداره أو المرور عن هذه السياره ؟

Multi Vitaminz said...

عزيزي

اتصدق لو يعطيني اياها احسن إذا مايبيها ..!

والمعاقين تبي يحترمونهم اهما ما احترمو الصاحي عشان يقدرون هذه الفئة ..!

تحياتي

بروفسور حمادو said...

why me

و لا يصير خاطرج إلا طيب يا أم فادي

جذي زين؟

بروفسور حمادو said...

Anonymous 4

عندهم الصلاحية و التشريع موجود ، لكن ما نفتقده غالبا هو التنفيذ

ربك يعين المعاق جسدياً من بعض المعاقين فكريا

تحياتي

بروفسور حمادو said...

Um il sa3af wil leef

كنت أدري انج ما بتوافقين عالأسباب و عشان جذي اخترتج

:)

الادارة و المرور يخورونها إذا ما ينقرصون من الرأي العام

بروفسور حمادو said...

Multi Vitaminz

راعي السيارة يجوز ميت ، يجوز عضو مجلس أمة أو وكيل وزارة كاتب شيكات بدون رصيد و منحاش ، يجوز يكون ألف شي

الرّك على المعاق فكرياً إن ما يراعي هالمسكين الضعيف المبتلى