Thursday 16 September 2010

رد: هالمرة برمودات سموه مو بربروداته

الظاهر إن الحرارة البرمودية اللي ذوّبت الجمود التدويني عن أنامل زميلنا فريج سعود "اللي تـْـتـْلـف بحرير" قد أصابتنا بأشعتها الدافئة ، و هذا البوست هو رد على بوست هالمرة برمودات سموه مو بربروداته ، فـ الزميل اللي تناول الموضوع من وجهة نظر برمودية بحتة أغفل الأسباب المحلية التي أدت للزيارة
الاخبار اللي طلعت حول اسباب الزيارة تواترت و اختلفت ـ لذلك ننقلها كما وصلت باختلاف الروايات
الحكاية الأولى ، الكابتن و هو طاير كان يقول سيداتي آنساتي سادتي نحن حاليا نحلق على ارتفاع ثلاث و ثلاثين الف قدم فوق سطح الأرض و نمر فوق جزيرة برمودا ، فواحد من اللي قاعدين ما اقدر اقول اسمه لف راسه عقب ما تمغّط بعنف و قال حق ثاني وراه بأربع كراسي هم ما اقدر اقول اسمه "اييييييه هذي اللي زرناها بالسفرة اللي طافت" ، الثاني قال له يبا هذيج غير هذيج بربودا مو برمودا ، رد الأول تراهن؟ الثاني قال شمنه؟ الاول قال من ثلاثين استكانة شاي و السفرة الياية ما تبربد و لا تبرمد معاي بسفرات الأمن الغــَذائي (بفتح الغين) ، الثاني "ساسر نفسه من زين بربوداتك الحين اللي البجاجي صارت تركب ويانا و طياراتنا قامت تنابح" لكنه ابتسم و قال قال صار يبا ، بس شوف اذا انت خسرت نفتر فيك و باجي ربعك (مادري ربعه شكو) بباص و ترجع الطيارة حافي .. الأول قال "تري بيين" يعني تم بالفرنسي ، و صاح يا كابتن "يا غـُلام" نزّل الطيارة .. و من كثر ما مستعجلين في الهبوط بسرعة بلغوا برج المراقبة في برمودا ، و بسبـّّـتها نائب حاكم الديرة ما لحق "يخلص اللي كان يسويه" و طلع لهم بالخري الحمر و هو بقول هذيل شعرّفهم بالأزياء ؛ نمشيها عليهم إن هذا زي ديرتنا ؛ و بما إن إسمنا برمودا ف صراويلنا هم برمودا ، و صاح قبل لا يطلع من البيت : يا عيال وقفوا الفلم و مو تخلصون النفيش لين أروح أشوف هذيل اللي يايين ما ندري من وين إش يبون و أرجع أكمل وياكم
أما الحكاية الثانية للهبوط فـ تقول ، إن الوجبة الرئيسية بالرحلة كانت مندي و عيش بخاري و لبن خلفات ، و للأسف اخترب نظام الصرف الصحي بالطيارة أسوة بمحطة مشرف ، فالأول ما اقدر اقول اسمه قال دقوا على فاضل صفر ، الثاني اللي هم ما اقدر اقول اسمه رد عليه على ما إيينا يصلح البايبات و ترسي مناقصة الصيانة على الخرافي إلا المصارين و الطيارة صايرين مفاعل "نطانز" ، الثالث اللي اتحفظ على كشف هويته قال للثاني يا خوك "كوّدها بالزاوية" هناك و خل فلان يقضب لك الوزار يداريك عن النظر، و هني اتخذ الكابتن قراره بالهبوط الاضطراري تفاديا لحدوث ما لا يحمد عقباه ، و لعلم الحاكمية في برمودا بالموضوع طرشوا لهم باص باربي وردي عشان يكون أنفه و الهوا ضارب فيه من كل صوب. طبعاً نائب حاكم الديرة ما لحق بهالوقت القصير "يخلص اللي كان يسويه" و طلع لهم بالخري الحمر و هو بقول هذيل شعرّفهم بالأزياء ؛ نمشيها عليهم إن هذا زي ديرتنا ؛ و بما إن إسمنا برمودا ف صراويلنا هم برمودا ، و صاح قبل لا يطلع من البيت : انتي يا حرمة يا لندا خلج منسدحة بالقوملق نطري لين اروح اخلص من الزوّار اللي يايين بوقت غلط و ارجع ، و حسج عينج أدش البيت و ألقاج بالدراعة
أما الحكاية الثالثة حول الهبوط ، ف كان إن واحد من اللي بالطيارة هم ما اقدر اقول اسمه قال حق اللي قاعد على يمينه بالـ جي كلاس (مضبطين كراسيهم حق تمدد الريول) هم ما اقدر اقول اسمه ؛ إن واحد من ربعنا البحرينين ما قـصـّر ، يوم زاروا برمودا قبل كم شهر يوقعون معاهم اتفاقية ياب لي خوش صراويل برمودا من هالديرة بس طلعوا ضيجين علي شوي "من صوب السـّر" ، شرايك بما إن إحنا فوقها فوقها و دام الصراويل كاهم معاي بالكيس ننزل ؛ منها نبدلهم بسايز أكبر "ما يحز" و منها نطلق رويلاتنا ، الثاني رد عليه لا تقول رويلاتنا يا ذيب يا شيتون يا كايد قلوب المعارضة ؛ انت حاسب حسابك و حاطهم بكيس عشان بسرعة بسرعة تخلص شغلك و نطير . و دام جذي يا كابتن "يا غـُلام" نزّل الطيارة ، الكابتن رد طال عمرك يقولون في برج المراقبة الحين وقت غداهم و مو حاسبين حسابهم على زيارتنا ، رد الأول ننزل يعني ننزل و راح أبدّل الصراويل بصراويل أكبر فيها جيوب عشان أحط فيهم الدستور يعني رح أبدّلهم. و من ورا الإصرار نائب حاكم الديرة ما لحق "يخلص اللي كان يسويه" و طلع لهم بالخري الحمر و هو بقول هذيل شعرّفهم بالأزياء ؛ نمشيها عليهم إن هذا زي ديرتنا ؛ و بما إن إسمنا برمودا ف صراويلنا هم برمودا ، و صاح قبل لا يطلع من البيت : انت يا ولد ياللي اسمك جوني اسحب السيفون ترى ما لحقت اسحبه ، و يا ليل ما اطولك مع الناس اللي تطب فجأة بدون ما تدق بيجر و لا تطرّش فاكس
الحكاية الرابعة كانت معاياة ما بين واحد ما أقدر أقول اسمه و ثاني ما أقدر أقول اسمه و ثالث أقدر أقول اسمه بس أخاف يزعل فـ ماني قايل ، الثالث عقب ما سمع الكابتن يعلن ان برمودا تحتهم قال لا يحوشك احنا الحين فوق المثلث اللي تختفي فيه الطيارات ، الثاني قال البواخر اللي تختفي بس إنت إش فهّمك ، الأول قال الدستور بجيبي (و طلعه و وراهم إياه و حطه على الطاولة) و المجلس معانا و الإرهاب ما يخوفنا و عندنا آي بود و نتابع المدوّنات ، و يا كابتن "يا غـُلام" نزّل الطيارة ورهم إن إحنا تقدر نواجه و طياراتنا ما تختفي. هني عاد قط الكابتن قير الطيارة عالهبوط ، و بلغوا نائب حاكم الديرة البرمودي اللي ما لحق "يخلص اللي كان يسويه" و طلع لهم بالخري الحمر و هو بقول هذيل شعرّفهم بالأزياء ؛ نمشيها عليهم إن هذا زي ديرتنا ؛ و بما إن إسمنا برمودا ف صراويلنا هم برمودا ، و صاح قبل لا يطلع من البيت : يا بنيّة ياللي اسمج جولي قضبي الهوز مكاني و ترسي حوض السباحة ماي و لا تنسين تحطين المارتيني بالثلاجة يبرد لين أروح أقـلـّط الشباب الضيوف بدون إحم ولا دستور و أرجع
الحين الربع قبل لا يطيرون "المسكيك" ، قالوا لهم البرموديين لو سمحتوا انتوا شارين بخور برمودي و بزمات برمودية و صراويل برمودية ، و بانزين الطيارة و أرضية المطار ، هذيل من يدفعهم؟ ترى احنا اقليم و مقاطعة بريطانية و الحاكم يعتبر ممثل للملكة إليزابيث مو رئيس وزراء ، يعني ديوان المحاسبة البريطاني يدقق فواتيرنا. و لا يغركم عندنا مطار و باص وردي و زولية ، تراه كله خرطي بخرطي ، إحنا حفّاي و بحماية و حكم و حساب العمام العنغريز ، و بدونهم ما نسوى بيزة ، و لا نشك خيط بإبرة من دون شورهم ، و حتى الأمم المتحدة مالنا أمل و لا جعفر بعضويتها ، و أمريكا بكبرها اللي تطالب فينا من أيام إيزنهاور مو معطينها ويه!! إهني واحد من الحاضرين ما أقدر أقول اسمه قال : نزلوا الخبر بالجرايد المحلية إنها زيارة رسمية (الربع شعرّفهم انها مستعمرة ، يمكن يظنون انها جمهورية) و قابلنا رئيس وزراءها و قابلوا رئيس وزراءنا ، و وقعنا معاهم اتفاقياتنا ، و وقعوا معانا اتفاقياتهم ، و بلّغناهم تحياتنا ، و بلّغونا تحيّاتهم ، و الحين "يا محتسب" ادفع لأصدقاءنا البرموديين المصروفات من "كيس مولاه" وكله حسب مسطرة ديوان المحاسبة ، و بلغهم إننا رح نرد لهم لمزيد من زيارات تعميق الأواصر بكافة المجالات ، و يا كابتن "يا غـُلام" صعّـد الطيارة
و خـلـّصـت و مـلـّّصـت .. و يـت الحكومة و عـنـفـصـت

14 comments:

دستورنا سورنا said...

انا يوم شفت الشورت الاحمر و السجاد الوردي قلت مستقبلهم بغرفة نوم مو مطار

بس صورة الطيارة ازالت لدي الشكوك


بالنسبة لدولة برمودا فالزي الرسمي لها مكون من جزئين جزء علوي و جزء سفلي

الجزء العلوي رسمي مثل المستعمر الإنجليزي

و الجزء السفلي شبابي مثل الطامع الأمريكي

Anonymous Farmer said...

إنت لو ليلحين قاعد بالمحكر مالك جان أبرك .

إعن ابوك سموه مو بس مو راضي يفج ، إلا لاهو بحولنا ولاهو قاعد يشوفنا .

وانت طايحله "رفيجي ورفيج رفيجي" ، وحجب الأسماء مع سبق الإصرار والترصد .

والهزلية المستهترة بالأوضاع ، وعقول القراء ، وما كان باستطاعتك كتابته بجدية .

بوست غير مقبول ، أطالب بحذفه وحذف كاتبه من أعلى عمارة بالديرة .

أما في حالة اعتذار الكاتب عن تقمص شخصية سعود بتناول الموضوع من جانب هزلي .

فممكن تخفيف العقوبة في هذه الحالة إلى الحذف من الطابق الثاني .


فارمر



الشرهة مو عليك ، الشرهة على ربعك اللي أطلقوا سراحك .

كلبجوه وردوه السرداب

Multi Vitaminz said...

احسنت حلم

why me said...

@@


لشمس من وين طالعه !!!!!

فريج سعود said...

تعددت الروايات والخري الاحمر واحد


انا اتوقع ان جزء من كل رواية حصل بالفعل


ويا زيين برمودات سموه


تبعث على النشاط

وطني الكويت said...

اتعب علي الاحمر
سؤال اين زينا الوطني
اين الوزار والفانيله العلاق

bo bader said...

اتعب على الأحمر والوردي يا حمادو ، ترى لهم مستقبل زاهر بالكويت !

بروفسور حمادو said...

عراب الدستور


انا عقب اللي قريته بالصحافة البرمودية عن الباص الوردي و الغـُطـْس الشاطئي ما زلت بشك

:)

بالنسبة لقضية الزي ، قد تكون منطقية و تضيف سبب جديد لزيارة الوفد الكويتي ، وهي للحد من "قيام" أزمة جديدة بين اصدقاءنا المستعمر و الطامع

بروفسور حمادو said...

Anonymous Farmer

انت اللي يمشي وراك آخرته بيلبس حزام ناسف و يفجـّر بمجلس الوزراء و الأمة

:)

يا ولد خل عنك الثورية الزايدة ، و تعلم من عمـو فريج سعود .. تجمـّل تجـمّل

شرايك اعزمك على سامبوكا باردة و تسرسح تهدي اعصابك.

:)

بروفسور حمادو said...

Multi Vitaminz

و أنت من المحسنين مولانا

بروفسور حمادو said...

why me

من ليفربول

:)

بروفسور حمادو said...

وطني الكويت

سؤالك لازم توجه فيه كتل الوطني و الشعبي و الاصلاح استجواب لرئيس مجلس الوزرا و وزير الخارجية

صراحة ، الربع مقصرين

بروفسور حمادو said...

bo bader

تعبان و خالص ، و متنقص 3 لي و لك و حق فريج سعود .. نصير وزرا يعني نصير وزرا

بروفسور حمادو said...

فريج سعود

عيل طافك الكرنفال اللي حضره بالمسكيك

إشرايك ندوره عالصحافة المسكيكية؟

:)